یادگارێکی جوان لە شاگردێکی خۆشبیرەوە

ئەمساڵیش هاتەوە هەروەکوو هەموو ساڵێک.

هەر وەکوو هەموو دەمەو نەورۆزیک. کە دێت، بۆنی کتێب و بۆنی بیری نوێ و بۆنی ئەمەگناسیی لەمێژینەی لێ دێت.

کە دێت هەر دوو جانتاکەی پڕە:

هەم جانتاکەی سەر شانی و هەم جانتاکەی ناو مێشکی.

لە جانتاکەی سەر شانی کتێب و نەورۆزانەی پێیە. هەموو کەس دەیبنێ.

لە جانتاکەی مێشکی وشەی نوێ و بیری نوێ و هەستی نوێی پێیە. ئەوە من دەیبینم.

من دەزانم لە کوێ ڕسکاوە و چۆن پەروەردە بووە و ئێستا چەنێ خاوەن بەرووبوومە.

هەر جارەو کە دێت، دەڵێ: قەرزدارم. هاتووم قەرزەکانم بدەمەوە.

هەر جارەو کە دێت، ئاوڕ لە ڕابردوو دەداتەوە و داهاتوو گەشتر دەبینێ.

هەر جارەو کە دێت، دڵی گەورەتر، بیری تیژتر و ڕوانینی جوانتر بووە.

هەر جارەو کە دێت و باسی مامۆستاکەی دەکات هەر خۆی بە شاگردە کلاس حەوتەکەی بیست و حەوت ساڵ لەوە پێشی پایگەلان دەزانێ. بەڵام نازانێ کە چەن ساڵە لە قوتابخانە نێرگزەجاڕەکانی کوردستانم بە پلەیەکی باش دەرچووە و لە مێژە مامۆستایە.

مامۆستایە لە ئەمەگناسی.

مامۆستایە لە کتێبناسی.

مامۆستایە لە مرۆڤناسی.